इन्द्रेणी संवाददाता
काठमाण्डौ, २५ फागुन
प्रहरीको केन्द्रीय अनुसन्धान ब्यूरोले नक्कली शैक्षिक प्रमाणपत्र पेश गरी डाक्टर बनेका फेरी अर्का एक जनालाई पक्राउ गरेको छ । धनुषा जनकपुर ९ का ३२ वर्षीय प्रदिपकुमार गुप्तालाई प्रहरीले पक्राउ गरेको हो । गुप्ताले नेपाल मेडिकल काउन्सिलमा चिकित्सक दर्ता प्रमाणपत्र परीक्षा दिनको लागि बिहार इन्टर मेडियट एजुकेशन काउन्सिलबाट प्रविणता प्रमाणपत्र तह उतीर्ण गरेको भनि नक्कली प्रमाणपत्र पेश गरेका थिए ।
उक्त प्रमाणपत्रका आधारमा चीनबाट एमविविएस अध्ययन गरी इन्र्टनशीप समेत गरी सर्वसाधारण मानिसहरूको उपचार गर्ने गरेको प्रहरीको आरोप छ । नेपाल मेडिकल काउन्सिलको चिकित्सक दर्ता प्रमाणपत्र परीक्षामा पटक पटक सहभागी भई अनुतिर्ण भएपछि यस पटकको परीक्षामा सहभागी हुन आएका गुप्तालाई प्रहरीले फक्रेको हो ।
गुप्तालाई नेपाल मेडिकल काउन्सिल ऐन २०२० को दफा २६ र २७ अनुसार आवश्यक अनुसन्धान प्रक्रिया सुरू गरिएको प्रहरीले जनाएको छ । प्रहरीले यसअघि पनि एक दर्जनभन्दा बढि नक्कली डाक्टरलाई पक्राउ गरी आवश्यक अनुसन्धान गरिरहेको छ ।।
